Basler Fasnacht

Wiideremool het e Baselstedter Institution d Frächhait gha, ihrer BL-Partnerorganisation Aine vor e Kopf z haue - BS will jetz pletzlig nimm hinder em BL-Lieblingskind TANGO stoh - vyyl lieber beschäftigt sich BS mit de Bedirfnis vo dr Kundschaft vom ÖV und die sinn als wie meh mit em Rollator unterwäggs...
Derby duet daas neyschte Stadler-Produkt sogar in "Downtown Switzerland" schampar gfalle, wie men im Video unschwär erkenne kaa...esooebbisaberau !!!

Under em Namme "Fümoar" hänn sich mit säggs Glaibasler Baize plus dr Schluggstuuben als assoziierts Mitgliid e paar urgmietligi Lokal zämmegschlosse, zem em Rauchverbot, wo ab em erschten Abrille z Basel gilt, Noochachtig z verschaffe. Uff d Reaggtione vom Staat simmer gspanne...!

Im Joor 2010 kunnt e gänzlig neyi Komponänte derzue an unsere drey scheenschte Dääg : Mir wärde mit kritischen Auge beobachtet; und zwor vo Auge, wo bis hitte iberhaupt e kai Interässen an unserer Fasnacht zaigt hänn. Aber no den Abstimmigsresultat vom letschte Herbscht nimmts die arabisch Wält Wunder, wie mir mit dämm Tirmli-Thema fasnächtlig-ironisch umgoh dien. Ass speziell mir Basler das notorisch bekannte Verbot abglähnt hänn, interessiert am Euphrat allwäg weniger - suscht wäre sii mit ihre TV-Kameras nämlig an Güdis-Mäntig Umzug gange und nit an unsere Cortège...aber ebbe, färnsehtechnisch isch es nadyrlig danggbarer, e grossi Ladärne z filme als irgend e Lozärner Gugge-Grind ...
Wie dä Sänder e Schnitzelbangg ibersetze will, wurd mii au no interessiere !

Do simmer jetz aber alli erlychteret ! Noonem zimlig lange Zämmesitzen und Beroote isch das Ai vom Columbus geboore. Rhypolizey, Dänggmoolschutz und Stadtbildkommission hänn e tolli Leesig fir e gar nit wirgglig vorhande Problem gfunde. S Problem wird aber sy, ass me daas Rettigsgrät vor luuter Tarnig gar nimm finde duet...und au e paar Glaibasler, wo dr FDP nooch stehn, wänn sich jetz uff politischem Wääg wehre !

Am näggschte Vogel Gryff Daag duet dr Leu in sym neyen "Outfit" in de Gasse vom Glaibasel umehipfe - daas duet ganz Glaibasel gfalle - schynts !
Uns uss em Basel äänen am Rhy dunggt, dä Gsell däät e bitzli gar gspässig drygseh - y main, uns goht s jo aigentlig nyt aa, aber d Ähnligkait mit eme Wääse zwischen em Yeti und em Harry Hasler isch nit ganz wägg z diskutiere...
Är syg schynts uss dr Hut vom enen Alpekalb gfertiget - y find , das gseht men em au aa...!

 

D Spatze hänn also doch Rächt ka , sy hänn s jo scho lang vo de Dächer im Glaibasel aabepfiffe: S Glaibasler CHARIVARI isch gstorbe - sehr schad finde mir daas; aber in de letschte Joore hesch jo miesse uss Ziiri ko oder wenigschtens e guete Kund vo dr UBS sy, ass den iberhaupt no yne ko bisch - jetz isch au die Bloose platzt !!!

D Mamme blybt hange - aber mir dien ums CHARIVARI bange...