Basler Fasnacht

Jetz hängge sy also, die erschte Textil-Himmel vom Klaus Littmaa. Zerscht het er kai Gäld ka, was bi syne Projäggt aber normal isch. Denn sinn Problem bi dr praktischen Umsetzig vo synere neyschte Kunscht-Intervention uffdaucht; d Huusbsitzer hänn nit iberall mitgmacht und an andere Stelle hets technischi Unwägbarkaite gäh (Staine, Clarastrooss, Bahnhofplatz). Fraie mer ys also iber das, wo scho realisiert worden isch...!

Wo goht daas no aane mit unserer Stadt. Under em Rendite-Drugg vo anonyme Immobilie-Buude goht Basel als wie meh dr Bach ab. Non em Verschwinde vo Glogge, Drache, Storche, Gambrinus, Berse und vyylen andere gmietlige Baize, sott s jetz em Rhyfälderhof, em Alte Wartegg, em Stadtkäller (?), em Gifthittli (?) und em MUTZ (!) an Graage goh... BASEL WACH UFF !!!

Mir alli zittere um unseri National-Wurscht; gnauer gsait um sy Hille. Mir kenne by de vorliigende Variante wähle zwische knackig, guet zem Schelle oder guet zem Breetle. Nadyrlig oder synthetisch - daas isch do d Froog, und die ganz Nation zitteret, obs in Zuekunft iberhaupt no Glepfer git; und schuld dra isch erscht no d EU...!