Basler Fasnacht

Noonem Zwaibainer, em Pinguin, wird dr Star vo dr Fasnacht 2008 allwäg uff alle Säggse ummerenne: dr Raymondionymus marqueti, dr Uuuuurywohner vo Basel. Är isch vo de Zircher (...) uss Wädenswil am Rhybord uffgspyrt worde, en ächt Tertiärrelikt, wie d Wisseschaftler maine, und ebbe grad zwai Millione Jeerli alt. Vulgo nennt är sich Ärdrisselkäferli.

Jetz wisse mer s gnau - e so gseht uns dr Räscht vo dr Schwyz...Mir lääbe nit nummen am Rand vom Land, mir lääben am Ändi vo dr Wält; und will unseri Ärde non e Schyyben isch, ligt daas Ändi grad am Rand vom Abgrund !!! Und dr Rhy fliesst erscht no in dr andere Richtig !? Soyez nos bienvenues, cher compatriotes !

En alti Idee wird ney uffdischt und isch als no aggtuell: s Drämmli soll d Innerstadt umfahre; eso gäbt s e kaini grien-gääle Wänd me im Härze vo dr Stadt, und d Fuessgänger kennte ungfäärdet flaniere. E tolli Idee !


do git s meh Infos zu dääre Idee

Am grooss uffzoogene Fescht fir s neye Casino hets nääben obligate Wirscht mit Brot au gratis Gigs mit meh oder weniger bekannte Interpreeten uss alle meeglige Stilrichtige gääh. Numme schaad, ass die zem Dail iberhaupt kai Dunscht dervo ka hänn, fir wär sii do in d Taschte, an d Saiten oder ans Mikrofon gryffe...au dr Polo National het das Lied kenne singe: "Ach wie gut, dass ich nicht weiss, für wen ich hier den A..... aufreiss ! "