Basler Fasnacht (e Forum fir d Basler Fasnacht)

Fasnacht fir Alli !

amadeus — 2006-02-11T16:39:37Z

Do isch s erscht Sujet vo dr Fasnacht 2006 ! D Idee und d Umsetzig isch nit laid, jo me ka sage sy isch glunge...
Wär als Passiv-Fasnächtler au emool mitlaufe wott, kaa sich do e Lärvli aabelaade, ussschnyde und zämmestegge - et voilà, fertig isch s zwaite Gsicht - vyyl Vergniege !

do kasch s Volggslärvli aabelaade

HamaTschau !

piccolomini — 2006-02-08T17:03:16Z

Liebe Hamatschu ! Dr ysig kalt Wind usserhalb vo de Basler Amtsstuube isch Dir offebar gar nit bikoo; Du hesch es in dr freye Wirtschaft versuecht und gmerggt, d Sitte sinn do rauer, und uff dämm Poschte bisch nit emool meh fir d Schnitzelbänggler e Thema. Mit Dym Ruggdritt hesch de Bänggelsänger jetz aber e Stailpass zuegspiilt; uss em HaMaTschuTschu wird dr HaMaTschau - MERCI !!!

Merci BVB !

piccolomini — 2006-01-09T18:36:23Z

Syt em 1. Jänner 2006 darfsch im Drämmli nimm ässe, dringge, luti Muusig loose, delifoniere und mit dr Zyttig raschle. Mir hänn ys scho gfrogt, was mache mer äggscht jetz uff unserer täglige Ritteltour in d Stadt ?
Aber d BVB het ys hit ganz unerwartet d Leesig präsentiert: Nohnem Combino gitts jetz dr Condomo, s neyscht Nohverkehrsmittel - mit und ohni Gschmagg, mit und ohni Farb - wenn daas kai Argumänt isch, mit dr BVB z fahre... MERCI VYYLMOOL !!!

drey Daag offe !

piccolomini — 2005-12-29T18:35:00Z

S Comité het gruefe - d Naare sinn ko,
und dr Felix het s Sujet-06 uusegloh :
Drey Daag offe...
Alli Fasnächtler - die alte und au die junge,
finde d Blaggedde daas Joor wirgglig glunge !
Was findsch denn Du; gib doch Dy Mainig in unserer Umfroog ab, merci.

d Umfroog zerzue

Bisch hässlig - kumm au in Club !

piccolomini — 2005-11-11T22:48:54Z

Fir uns Hässlige kunnt jetzt ändlig d Leesig: Club der Hässlichen.
S Motto "geteiltes Leid ist halbes Leid" gilt offebar au in Sache isserem Erschynigsbild. Aber was isch aigetlig "hässlig", und wär bestimmt daas ? Y find s Maskottli vo däm Club, dr Naasenaff, ussgsproche härzig und hibsch !

let's blog

amadeus — 2005-11-10T19:01:03Z

E Virus setzt sich im Internet langsam aber sicher duure. Wenn me Ebbis z sage het (oder au nit...) und das meegligscht vyle Lyt mitdaile wott, denn buecht men en aigene Blog und setzt dermit syni gaischtigen Ergiss ins Netz; zem Dail mit eren erstuunlige Resonnanz ! E baar Byspyl: Fasnacht, Stilblieten uss dr BaZ, Dorfpolitik, Gedangge vom ene Pändler,Kunscht im Blog.

BL isch in und cool...

amadeus — 2005-11-07T16:46:26Z

Basel-Land und Zürich entwickeln sich am nachhaltigsten

Resultate eines Kantone-Quervergleichs

Die Kantone Basel-Landschaft und Zürich entwickeln sich am nachhaltigsten. Dies zeigt ein Quervergleich, in dem erstmals der Stand der nachhaltigen Entwicklung in verschiedenen Kantonen und Städten eruiert wurde, wie das Bundesamt für Raumplanung (ARE) am Montag mitteilte.

(ap/sda/bbu.) Wo ist die Umwelt noch intakt, wo sind die Löhne hoch und die Mietpreise tief, wo lebt es sich am angenehmsten? Das Bundesamt für Raumentwicklung (ARE) hat 8 Kantone und 14 Städte einem so genannten Nachhaltigkeitsvergleich unterzogen.
Breit absgestützte Indikatoren

Eingeteilt in die Bereiche Umwelt, Wirtschaft und Gesellschaft wurden für die Kantone und Gemeinden je rund 30 zum Teil unterschiedliche Indikatoren aufgestellt. Zentrale Funktion dieser Indikatoren ist die Beurteilung des aktuellen Standes und der zeitlichen Veränderung, wie das ARE am Montag mitteilte. Die Indikatoren umfassen dabei so unterschiedliche Bereiche wie die die Belastung durch Industrie- oder Verkehrslärm, Gesundheit der Kantonsfinanzen aber auch den Brutvogel-Index.

PS: Dä Artiggel han y in dr NZZ gfunde. BL und ZH am noochhaltigschte...? (By däm Bewärtigssystem het me ACHT Kanteen mitenand vergliche...). Aber in Sache Bruetvogel-Index wär BS sowyso zimmlig wyt hinde !

Tschau Jögge !

piccolomini — 2005-11-05T16:31:53Z

Jetz hesch es also gschafft - Du bisch Dy schwääri Lascht vom Basler Regierigsamt elegant los worde. Und scho hert me dr Sirenegsang uff Dy Amtszyt vo alle Frind und Find hyyle...! Jetz kasch au wiider unbeschwärt d Fasnacht gniesse, ohni ass Du ständig dumm aagmacht wirtsch... Merci Jögge, machs guet !

Ykaufs-Paradys Basel ?!

amadeus — 2005-09-27T19:01:18Z

"Ykaufe in dr Stadt isch glatt", "my Mami kauft alles in dr Stadt" und jetz "Basel - geöffnet". Mit däne Sprich loggt ys dr Gwärbverband allewyl in d Innerstadt. Aber au 2005 wärden unseri Ykaufs-Däsche leer blybbe, will mir vor verschlossene Diire stehn. S Motto sott nämlig haisse " jedem Läädeli sy aigeni Effnigszyt..." ! Tipp: In Rhyfälde kasch au zmitts in dr Nacht go läädele - im Notfall au mit Kopfladärnli...

de gustibus non est ...!

piccolomini — 2005-09-07T16:06:47Z

Finde Sii dä Garte/Boulevard au vellig dernääbe ? Hejo - do stehn jo die unterschiidligschte Pflanze ungordnet nääbenander. Aber ändlig wird dämm Wildwuggs vom Baudepartemänt e Riigel gschoobe ! Ornig muess halt sy - mir lääben in BASEL...

Basel rennt am 1. Basel-Marathon

piccolomini — 2005-08-29T15:29:03Z

Ändlig het au Basel en aigene City Marathon. Jetz hänn au Basler Promis (Malama und Co.) d Glägehait, sich sportlig z profilieren und in e fits Rampeliecht z stelle.
Mir fraien ys uff dr 2. Lauf-Event am 3. Septämber 2006...!

dr minu im "www" !

piccolomini — 2005-08-24T17:08:59Z

Jetz isch au unser aller minu mit eren aigene Syte im Netz verträdde. Mir kenne alli syni literarische und kulinarische Ergiss ändlig in Rueh aabelaaden und gniesse - wenn daas kai Sujet isch...

do gohts zem minu

no sports....

piccolomini — 2005-08-22T19:45:34Z

20.08.2005 uff em Märt in Basel: Glaibasel gege Grossbasel; Resultat 2:0; Siiger isch dr Basler Sauglattismus und "no sports"...

Do non e glaine Bhaltis zem Iebe uff dr Wettstryt im näggschte Joor:

d Spezi Sujet-Lischte

piccolomini — 2005-08-19T00:03:37Z

1. Das Berner Tram

2. Bush is back

3. Die Macht ist mit uns

4. Switzerland, 12 points

5. Latvia, 10 points

6. Germany, 0 points

7. U-Haft im Hardturm

8. Zürich zu Deutschland

9. Revolution im Bauernstaat

10. Die Wüste lebt

Salon Bâle

amadeus — 2005-08-17T16:10:30Z

Isch es Ihne au scho soo gange? Bim Aaluege vo Salon Bâle uff Telebasel isch die scheen Sunntigsstimmig uff ai Schlag verflooge. Me frogt sich ärnschthaft, iber was sich unseri Glepfer-Prominänz alles ussloh und uffrege ka. Dr maischtens iberforderet Talk-Maschter spiilt dr Ball mit ere Stailvorlag syne Gescht (Zanolari, Messmer, Miesch, Lüthi-Hauser, Meschberger, Jans, Fetz, Krattiger, Gysin, Pegoraro, Emmenegger, Baader uvam.) zue und die stirze sich inbrinschtig in saichti, belangloosi Diskussione - wie lang wird uns dä TELE24-Abklatsch ächt no zuegmuetet ?