Basler Fasnacht (e Forum fir d Basler Fasnacht)

E so gseht uns d Schwyz...

piccolomini — 2007-02-08T16:30:00Z

Jetz wisse mer s gnau - e so gseht uns dr Räscht vo dr Schwyz...Mir lääbe nit nummen am Rand vom Land, mir lääben am Ändi vo dr Wält; und will unseri Ärde non e Schyyben isch, ligt daas Ändi grad am Rand vom Abgrund !!! Und dr Rhy fliesst erscht no in dr andere Richtig !? Soyez nos bienvenues, cher compatriotes !

Verkehrsfreys Härz

piccolomini — 2007-02-08T16:20:00Z

En alti Idee wird ney uffdischt und isch als no aggtuell: s Drämmli soll d Innerstadt umfahre; eso gäbt s e kaini grien-gääle Wänd me im Härze vo dr Stadt, und d Fuessgänger kennte ungfäärdet flaniere. E tolli Idee !

do git s meh Infos zu dääre Idee

Polo-Missbruuch

piccolomini — 2007-01-17T16:45:00Z

Am grooss uffzoogene Fescht fir s neye Casino hets nääben obligate Wirscht mit Brot au gratis Gigs mit meh oder weniger bekannte Interpreeten uss alle meeglige Stilrichtige gääh. Numme schaad, ass die zem Dail iberhaupt kai Dunscht dervo ka hänn, fir wär sii do in d Taschte, an d Saiten oder ans Mikrofon gryffe...au dr Polo National het das Lied kenne singe: "Ach wie gut, dass ich nicht weiss, für wen ich hier den A..... aufreiss ! "

Aadie Läggerlihuus.....

piccolomini — 2006-12-02T18:25:00Z

Jetz isch glar, wo s mit em Läggerlihuus aane goht. E wyter Wohrzaiche vo Basel kunnt in Zircher Händ - und wird allwäg bald in Tirggel-Huus umdauft wärde !

Stopp am Handy-Terror

piccolomini — 2006-09-06T16:18:00Z

Du hesch Dii bestimmt au scho gärgeret iber e Natel-Tschanggi, wo mit sym Geblabber uff em Sagg-Delifon partout kai Ruggsicht uff sy Ummgääbig gnoh het. Jetz kasch Dy aber wehre, mit dr Rote Karte - daas macht richtig Schpass ! Y wird s an dr näggschte Fasnacht teschte...

Do kasch Gnauers erfahre

e Rialto Brugg fir Basel

piccolomini — 2006-05-13T15:09:00Z

Lueg emool die Turischte Attraggtion ganz genau aa - fallt Dir ebbis uff ? Ebbe - bald fahre wohrschynlig au no grad Gondle an dr Stell vo Drämmli dur s Glaibasel !!!

Waldspaziergang im Konsi

piccolomini — 2006-04-28T21:09:00Z

Dr Konsi (COOP) schänggt uns jetz e vellig neys Ykaufsvergniege. Am Samschtig paggsch Dy ganzi Familie (ohni Fifi, dä lehn sy noonig yne...) in Kaare und farsch in näggschte Konsi zem go loose, wie s im richtige Wald deene duet. Dr COOP losst uns d Grysch und Deen (Spächt, Auerhahn, Eichhernli, Wildsau, Hirsch, Biinli u.a.) vom Wald gniesse - ganz ohni Angscht vor Zäggebiss und anderem.

Glaubsch es nit ? Gang go loose !

Wär het dr Böögg ?

piccolomini — 2006-04-19T17:47:00Z

Ojee - jetz goots am Böögg scho vor sym groosse Daag an Graage ! E baar nätti (will linggi) Nachtbuebe hänn dr Pfyffe rauchendi Wattemaa entfiehrt. Denn hänn die beese Strolche non en Ooschterhaas und e Zeedel hinterloh:" Dr Böögg het d Naase voll, fir d Bonze sy Kopf aanezheebe !"
Gegen en Ysatz als Sujet-Liiferant fir d Basler Fasnacht het är sicher nyt yzwände...!

Aadie Räppler

piccolomini — 2006-04-15T17:34:00Z

Jetz isch er numme no Gschicht - dr gliebt Räppler isch vom Bundesroot abgschafft worde. Grad no bliibe darf s Fimferli - bis zem näggschte Mool weenigschtens, will au är nimm rentiere duet...!

en uniformi Schuel

piccolomini — 2006-03-24T22:03:39Z

Dr Basler Schuel-Stoff isch passé, dr aggtuell Trend haisst Basler Schuel-Uniform...
und s Bescht derby, d Schnittmuschter und d Stoff-Muschter kasch bym ED bezieh !